ishq mein Duba to phir main na dobara nikla

ishq meñ Duubā to phir maiñ na dobāra niklā

ye vo dariyā thā ki jis kā na kināra niklā

ik faqat tujh se hī ummīd-e-farāmoshī thī

tujh se ai dil na magar kaam hamārā niklā

jān-o-dil pe mire ban aa.ī hai is ulfat meñ

ishq ke saude meñ kyoñ itnā ḳhasāra niklā

ġham-e-tūfāñ ne Duboyā hai safīna apnā

is talātum meñ bhī koī na kināra niklā

ab duā se hī faqat ishq kā darmāñ ho to ho

chārasāzoñ se na is kā koī chāra niklā

sang-e-dil se tirī yaad aa ke jo Takrā.ī thī

choT patthar pe paḌī aur sharāra niklā

maiñ to sahrā meñ sarāboñ se bujhātā huuñ pyaas

ab samundar bhī mirī pyaas se haarā niklā

kab talak 'qalb' ye ġham yūñhī dabātā āḳhir

ashk jo Tapkā to phir dard hamārā niklā

ishq mein Duba to phir main na dobara nikla

ye wo dariya tha ki jis ka na kinara nikla

ek faqat tujh se hi ummid-e-faramoshi thi

tujh se ai dil na magar kaam hamara nikla

jaan-o-dil pe mere ban aai hai is ulfat mein

ishq ke saude mein kyon itna KHasara nikla

gham-e-tufan ne Duboya hai safina apna

is talatum mein bhi koi na kinara nikla

ab dua se hi faqat ishq ka darman ho to ho

chaarasazon se na is ka koi chaara nikla

sang-e-dil se teri yaad aa ke jo Takrai thi

choT patthar pe paDi aur sharara nikla

main to sahra mein sarabon se bujhata hun pyas

ab samundar bhi meri pyas se haara nikla

kab talak 'qalb' ye gham yunhi dabaata aaKHir

ashk jo Tapka to phir dard hamara nikla