ishq mein gul ke jo nalan bulbul-e-ghamnak hai

'ishq meñ gul ke jo nālāñ bulbul-e-ġhamnāk hai

gul bhī us ke ġham meñ dekho kyā garebāñ-chāk hai

dāġh-bar-dāġh ashk-bar-ashk apnī chashm o dil meñ haiñ

kyā balā gul-ḳhez ai yaaro ye musht-e-ḳhāk hai

ai ḳhizar jā.ūñ kahāñ maiñ kūcha-e-mai-ḳhāna chhoḌ

ḳhush-dilī kā maulid o manshā ye ḳhāk-e-pāk hai

ġharq-sar-tā-pā huuñ bahr-e-be-karān-e-ḳhūñ meñ maiñ

āshnā pūchhe hai to ye chashm kyuuñ namnāk hai

sarv kī nisbat se us qadd-e-balā baalā ko kyā

ḳhushk chob-e-pā bigul ye vo qad-e-chālāk hai

haa.e kin āñkhoñ se dekhūñ us ruḳh-e-raushan pe ḳhat

chashma-e-ḳhurshīd meñ ye kyā ḳhas-o-ḳhāshāk hai

kāfir o momin ko riqqat ġham meñ hai 'hasrat' ke haa.e

kuchh ḳhudā kā Dar bhī tujh ko ai but-e-bebāk hai

'ishq mein gul ke jo nalan bulbul-e-ghamnak hai

gul bhi us ke gham mein dekho kya gareban-chaak hai

dagh-bar-dagh ashk-bar-ashk apni chashm o dil mein hain

kya bala gul-KHez ai yaro ye musht-e-KHak hai

ai KHizar jaun kahan main kucha-e-mai-KHana chhoD

KHush-dili ka maulid o mansha ye KHak-e-pak hai

gharq-sar-ta-pa hun bahr-e-be-karan-e-KHun mein main

aashna puchhe hai to ye chashm kyun namnak hai

sarw ki nisbat se us qadd-e-bala baala ko kya

KHushk chob-e-pa bigul ye wo qad-e-chaalak hai

hae kin aankhon se dekhun us ruKH-e-raushan pe KHat

chashma-e-KHurshid mein ye kya KHas-o-KHashak hai

kafir o momin ko riqqat gham mein hai 'hasrat' ke hae

kuchh KHuda ka Dar bhi tujh ko ai but-e-bebak hai