عشق میں جان کے نقصان بہت ہوتے ہیں

عشق میں جان کے نقصان بہت ہوتے ہیں

کامیابی کے بھی امکان بہت ہوتے ہیں

شوخی آنکھوں سے چھلک جائے تو حیرت نہ کرو

عمر جب کم ہو تو ارمان بہت ہوتے ہیں

چاند کو چاند جو میں بزم میں کہہ دیتا ہوں

جانے کیوں لوگ پریشان بہت ہوتے ہیں

ان کی تھوڑی سی توجہ پہ بھی اتراتا ہوں

مان کے ساتھ ہوں دو پان بہت ہوتے ہیں

کچھ اثر ہی نہیں لیتا ہے محبت کا مزاج

عقل کے شہر میں اعلان بہت ہوتے ہیں

یہ الگ بات ذرا بھی انہیں احساس نہیں

دیکھنے والے تو حیران بہت ہوتے ہیں

جب تلک ہاتھ نہیں آتی ہنر کی گرمی

شعر ہوتے ہیں تو بے جان بہت ہوتے ہیں

اچھے شاعر کے لئے چار ورق کم بھی نہیں

یوں تو پھر صاحب دیوان بہت ہوتے ہیں