عشق میں کامیاب ہوتا ہے

عشق میں کامیاب ہوتا ہے

جس قدر جو خراب ہوتا ہے

اس کا جس پر عتاب ہوتا ہے

لاکھ میں انتخاب ہوتا ہے

حسن جب بے نقاب ہوتا ہے

سارا عالم حجاب ہوتا ہے

نگہ التفات کو روکو

شوق تسکیں خراب ہوتا ہے

حسن سادہ مزاج کیا جانے

دل جہاں کامیاب ہوتا ہے

عشق کا دوسرا جواب کہاں

عشق اپنا جواب ہوتا ہے

ضبط کیجے تو عشق میں اکثر

ضبط نا کامیاب ہوتا ہے

ان کو قید نقاب سے کیا کام

جن کا جلوہ نقاب ہوتا ہے

درمیاں حسن و عشق کے افسوںؔ

ایک نازک حجاب ہوتا ہے