ishq mein kya kaam karti aql-o-danai ki baat

ishq meñ kyā kaam kartī aql-o-dānā.ī kī baat

do-qadam aage chalī izzat se rusvā.ī kī baat

vaqt-e-mushkil ġhair kyā apne bhī dushman ban ga.e

kah gayā hai josh meñ dīvāna gahrā.ī kī baat

kaam kartā hai tasavvur kaam aatī hai nazar

be-sabab hotī nahīñ hai jalva-ārā.ī kī baat

muskurātā huuñ to āñkhoñ meñ machal jaate haiñ ashk

dard meñ ghul-mil ga.ī hai ek harjā.ī kī baat

parda-dārī kī numā.ish ho rahī hai roz-o-shab

ik tamāshā ban ga.ī hai ḳhud tamāshā.ī kī baat

ḳhud-baḳhud pairoñ se ristā hai 'ḳhizar' mere lahū

jab koī kartā hai mujh se ābla-pā.ī kī baat

ishq mein kya kaam karti aql-o-danai ki baat

do-qadam aage chali izzat se ruswai ki baat

waqt-e-mushkil ghair kya apne bhi dushman ban gae

kah gaya hai josh mein diwana gahrai ki baat

kaam karta hai tasawwur kaam aati hai nazar

be-sabab hoti nahin hai jalwa-arai ki baat

muskuraata hun to aankhon mein machal jate hain ashk

dard mein ghul-mil gai hai ek harjai ki baat

parda-dari ki numaish ho rahi hai roz-o-shab

ek tamasha ban gai hai KHud tamashai ki baat

KHud-baKHud pairon se rista hai 'KHizar' mere lahu

jab koi karta hai mujh se aabla-pai ki baat