ishq mein mujhko bigaD kar ab sanwarna aa gaya

ishq meñ mujh ko bigaḌ kar ab sañvarnā aa gayā

ho gayā nākām lekin kaam karnā aa gayā

ye agar sach hai ki mujh ko ishq karnā aa gayā

to samajh lo roz jiinā roz marnā aa gayā

dāva-e-ishq-o-vafā par mujh ko marnā aa gayā

kah guzarne kī jagah ab kar guzarnā aa gayā

varta-e-dariyā-e-ġham ne aise ġhote de diye

Dūbnā phir Duub kar mujh ko ubharnā aa gayā

chand ḳhūñ-ālūda aañsū jazb-e-dāman ho ga.e

paikar-e-sāda meñ ġham ko rañg bharnā aa gayā

sheva-e-ishq-o-vafā meñ ham ko nākāmī sahī

kam se kam ye to huā be-maut marnā aa gayā

shauq se zulm-o-sitam ab roz Dhāte jā.iye

ahl-e-ġham ko ġham uThā kar ġham na karnā aa gayā

kuchh tavahhum kuchh tavaqqo.a kuchh alam kuchh imbisāt

ishq kar ke mujh ko jiinā aur marnā aa gayā

kasrat-e-āzār ne ta.alīm de dī zabt kī

jabr ke baa.is se dil ko sabr karnā aa gayā

ashk āñkhoñ meñ pahuñch kar dil meñ phir vāpas ga.e

yuuñ samajh le chaḌhte dariyā kā utarnā aa gayā

kam se kam thā ik tarah kā aasrā iqrār tak

lekin un ko saaf ab inkār karnā aa gayā

rahguzar se ishq kī maiñ aaj tak guzrā nahīñ

kis tarah kah duuñ mujhe jī se guzarnā aa gayā

husn kī naḳhvat ne pahuñchāyā uḌā kar arsh tak

ab to pariyoñ kā bhī tum ko par katarnā aa gayā

bahr-e-zauq-o-shauq meñ ye bhī ġhanīmat jāniye

'nūh' ko tūfān uThā kar ġharq karnā aa gayā

ishq mein mujh ko bigaD kar ab sanwarna aa gaya

ho gaya nakaam lekin kaam karna aa gaya

ye agar sach hai ki mujh ko ishq karna aa gaya

to samajh lo roz jina roz marna aa gaya

dawa-e-ishq-o-wafa par mujh ko marna aa gaya

kah guzarne ki jagah ab kar guzarna aa gaya

warta-e-dariya-e-gham ne aise ghote de diye

Dubna phir Dub kar mujh ko ubharna aa gaya

chand KHun-aluda aansu jazb-e-daman ho gae

paikar-e-sada mein gham ko rang bharna aa gaya

shewa-e-ishq-o-wafa mein hum ko nakaami sahi

kam se kam ye to hua be-maut marna aa gaya

shauq se zulm-o-sitam ab roz Dhate jaiye

ahl-e-gham ko gham uTha kar gham na karna aa gaya

kuchh tawahhum kuchh tawaqqoa kuchh alam kuchh imbisat

ishq kar ke mujh ko jina aur marna aa gaya

kasrat-e-azar ne talim de di zabt ki

jabr ke bais se dil ko sabr karna aa gaya

ashk aankhon mein pahunch kar dil mein phir wapas gae

yun samajh le chaDhte dariya ka utarna aa gaya

kam se kam tha ek tarah ka aasra iqrar tak

lekin un ko saf ab inkar karna aa gaya

rahguzar se ishq ki main aaj tak guzra nahin

kis tarah kah dun mujhe ji se guzarna aa gaya

husn ki naKHwat ne pahunchaya uDa kar arsh tak

ab to pariyon ka bhi tum ko par katarna aa gaya

bahr-e-zauq-o-shauq mein ye bhi ghanimat jaaniye

'nuh' ko tufan uTha kar gharq karna aa gaya