عشق میں ربط جسم و جاں نہ رہا

عشق میں ربط جسم و جاں نہ رہا

اپنا اپنے پہ مہرباں نہ رہا

حسن کس شے سے کب عیاں نہ رہا

وہ نہاں ہو کے بھی نہاں نہ رہا

کب وفائیں نہ کامیاب ہوئیں

کب تماشائے امتحاں نہ رہا

شان اس میں بھی تھی محبت کی

میں جو آمادۂ فغاں نہ رہا

کب ترے عشق کی نہ کی توقیر

کب میں ہستی سے بد گماں نہ رہا

ہر نفس تھیں مآل پر نظریں

شادمانی پہ شادماں نہ رہا

کہئے اس بیکسی کو کیا کہئے

میں رہا اور آشیاں نہ رہا

اللہ اللہ صعوبت رہ عشق

دو قدم ساتھ رہرواں نہ رہا

زیست سے کیا امید الفت میں

دل سا جب دوست مہرباں نہ رہا

دے کے جاں عشق میں انہیں پایا

یہ تو سودا کوئی گراں نہ رہا

کب اٹھائے نہ رنج اے رافتؔ

کس زمیں پر یہ آسماں نہ رہا