ishq mein soz na ho husn mein tasKHir na ho

ishq meñ soz na ho husn meñ tasḳhīr na ho

phir to taḳhrīb hī duniyā meñ ho ta.amīr na ho

terī insān ye azmat na ho tauqīr na ho

ma.asiyat kī jo tire paañv meñ zanjīr na ho

shikva-e-kātib-e-taqdīr bajā hai lekin

dast-e-tadbīr meñ jab dāman-e-taqdīr na ho

dil kī āvāz asar se nahīñ hotī ḳhālī

hai kamī tujh meñ agar baat meñ tāsīr na ho

tū batā tere sivā aur maiñ kis se māñgūñ

iḳhtiyār itnā ki sarzad koī taqsīr na ho

araq-ālūd jabīñ nīchī nazar lab pe hañsī

jis ko vo dekh rahe haiñ mirī tasvīr na ho

ishq mein soz na ho husn mein tasKHir na ho

phir to taKHrib hi duniya mein ho tamir na ho

teri insan ye azmat na ho tauqir na ho

masiyat ki jo tere panw mein zanjir na ho

shikwa-e-katib-e-taqdir baja hai lekin

dast-e-tadbir mein jab daman-e-taqdir na ho

dil ki aawaz asar se nahin hoti KHali

hai kami tujh mein agar baat mein tasir na ho

tu bata tere siwa aur main kis se mangun

iKHtiyar itna ki sarzad koi taqsir na ho

araq-alud jabin nichi nazar lab pe hansi

jis ko wo dekh rahe hain meri taswir na ho