ishq mein ye hui haalat tere diwane ki

ishq meñ ye huī hālat tire dīvāne kī

ab na jiine kī tamannā hai na mar jaane kī

raqs miinā kā kabhī shoḳhiyāñ paimāne kī

yaad aatī haiñ fazā.eñ tire maiḳhāne kī

kuchh is andāz se tartīb diyā hai maiñ ne

tum se tashrīh na hogī mire afsāne kī

merī qismat hī meñ likkhī thī tabāhī ai dost

hai shikāyat mujhe apne kī na begāne kī

vo bhī bīmār-e-mohabbat kā uḌāte haiñ mazāq

dekh kar jin ko tavaqqo.a thī sambhal jaane kī

kyuuñ na tauqīr kareñ aaj mirī ahl-e-haram

ḳhaak chhānī hai bahut maiñ ne sanam-ḳhāne kī

hijr ālām ḳhalish soz taḌap dard-e-jigar

surḳhiyāñ haiñ ye mire ishq ke afsāne kī

ishq mein ye hui haalat tere diwane ki

ab na jine ki tamanna hai na mar jaane ki

raqs mina ka kabhi shoKHiyan paimane ki

yaad aati hain fazaen tere maiKHane ki

kuchh is andaz se tartib diya hai main ne

tum se tashrih na hogi mere afsane ki

meri qismat hi mein likkhi thi tabahi ai dost

hai shikayat mujhe apne ki na begane ki

wo bhi bimar-e-mohabbat ka uDate hain mazaq

dekh kar jin ko tawaqqoa thi sambhal jaane ki

kyun na tauqir karen aaj meri ahl-e-haram

KHak chhani hai bahut main ne sanam-KHane ki

hijr aalam KHalish soz taDap dard-e-jigar

surKHiyan hain ye mere ishq ke afsane ki