ishq mein zabt-e-fughan darkar hai

ishq meñ zabt-e-fuġhāñ darkār hai

be-zabānī kī zabāñ darkār hai

dair-o-ka.aba se nahīñ koī ġharaz

mujh ko terā āstāñ darkār hai

vahshat-e-dil kā ho koī to ilaaj

sohbat-e-pīr-e-muġhāñ darkār hai

mere dil kī samt vo nazreñ uThīñ

bijliyoñ ko āshiyāñ darkār hai

shauq se aa kar mire dil meñ raheñ

aap ko ḳhālī makāñ darkār hai

in ghanī zulfoñ kā saaya kījiye

dhuup meñ ik sā.ebāñ darkār hai

maiñ isī duniyā ko kahtā huuñ bahisht

shaiḳh ko bāġh-e-jināñ darkār hai

vārdāt-e-qalb hai mujh ko aziiz

aap ko husn-e-bayāñ darkār hai

rāz-e-dil kis par karūñ maiñ āshkār

koī dil kā rāzdāñ darkār hai

nā-shanāsān-e-adab mere harīf

sohbat-e-dānish-varāñ darkār hai

zindagī se ho gayā hai dil uchāT

phir hadīs-e-dil-barāñ darkār hai

hāsidoñ meñ ghir gayā huuñ ai 'bahār'

fikr-o-fan kā qadr-dāñ darkār hai

ishq mein zabt-e-fughan darkar hai

be-zabani ki zaban darkar hai

dair-o-kaba se nahin koi gharaz

mujh ko tera aastan darkar hai

wahshat-e-dil ka ho koi to ilaj

sohbat-e-pir-e-mughan darkar hai

mere dil ki samt wo nazren uThin

bijliyon ko aashiyan darkar hai

shauq se aa kar mere dil mein rahen

aap ko KHali makan darkar hai

in ghani zulfon ka saya kijiye

dhup mein ek saeban darkar hai

main isi duniya ko kahta hun bahisht

shaiKH ko bagh-e-jinan darkar hai

wardat-e-qalb hai mujh ko aziz

aap ko husn-e-bayan darkar hai

raaz-e-dil kis par karun main aashkar

koi dil ka raazdan darkar hai

na-shanasan-e-adab mere harif

sohbat-e-danish-waran darkar hai

zindagi se ho gaya hai dil uchaT

phir hadis-e-dil-baran darkar hai

hasidon mein ghir gaya hun ai 'bahaar'

fikr-o-fan ka qadr-dan darkar hai