ishq na-kaamyab hona tha

'ishq nā-kāmyāb honā thā

mujh ko ḳhāna-ḳharāb honā thā

tum se jab baat ho na paa.ī kabhī

yuuñ lagā din ḳharāb honā thā

aa ga.e tum to mai-kada kyā hai

varna shauq-e-sharāb honā thā

bebasī kyoñ basī hai chitvan meñ

terī āñkhoñ meñ ḳhvāb honā thā

zāhid-o-pārsā se guft-o-shunīd

bas ‘azāb-o-savāb honā thā

kyoñ kisī aur kā nasīb hue

tum ko merā nisāb honā thā

nafratoñ kī siyāsateñ kab tak

koī din ijtināb honā thā

dhokā sahrā meñ khā ga.e 'shārib'

dasht thā to sarāb honā thā

'ishq na-kaamyab hona tha

mujh ko KHana-KHarab hona tha

tum se jab baat ho na pai kabhi

yun laga din KHarab hona tha

aa gae tum to mai-kada kya hai

warna shauq-e-sharab hona tha

bebasi kyon basi hai chitwan mein

teri aankhon mein KHwab hona tha

zahid-o-parsa se guft-o-shunid

bas ‘azab-o-sawab hona tha

kyon kisi aur ka nasib hue

tum ko mera nisab hona tha

nafraton ki siyasaten kab tak

koi din ijtinab hona tha

dhoka sahra mein kha gae 'shaarib'

dasht tha to sarab hona tha