ishq nashsha hai na jadu jo utar bhi jae

ishq nashsha hai na jaadū jo utar bhī jaa.e

ye to ik sail-e-balā hai so guzar bhī jaa.e

talḳhī-e-kām-o-dahan kab se azāb-e-jāñ hai

ab to ye zahr rag o pai meñ utar bhī jaa.e

ab ke jis dasht-e-tamannā meñ qadam rakkhā hai

dil to kyā chiiz hai imkāñ hai ki sar bhī jaa.e

ham bagūloñ kī tarah ḳhāk-basar phirte haiñ

paañv shal hoñ to ye āshob-e-safar bhī jaa.e

luT chuke ishq meñ ik baar to phir ishq karo

kis ko mālūm ki taqdīr sañvar bhī jaa.e

shahr-e-jānāñ se pare bhī ka.ī duniyā.eñ haiñ

hai koī aisā musāfir jo udhar bhī jaa.e

is qadar qurb ke baad aise judā ho jaanā

koī kam-hausla insāñ ho to mar bhī jaa.e

ek muddat se muqaddar hai ġharīb-ul-vatanī

koī pardes meñ nā-ḳhush ho to ghar bhī jaa.e

ishq nashsha hai na jadu jo utar bhi jae

ye to ek sail-e-bala hai so guzar bhi jae

talKHi-e-kaam-o-dahan kab se azab-e-jaan hai

ab to ye zahr rag o pai mein utar bhi jae

ab ke jis dasht-e-tamanna mein qadam rakkha hai

dil to kya chiz hai imkan hai ki sar bhi jae

hum bagulon ki tarah KHak-basar phirte hain

panw shal hon to ye aashob-e-safar bhi jae

luT chuke ishq mein ek bar to phir ishq karo

kis ko malum ki taqdir sanwar bhi jae

shahr-e-jaanan se pare bhi kai duniyaen hain

hai koi aisa musafir jo udhar bhi jae

is qadar qurb ke baad aise juda ho jaana

koi kam-hausla insan ho to mar bhi jae

ek muddat se muqaddar hai gharib-ul-watani

koi pardes mein na-KHush ho to ghar bhi jae