ishq ne chuTki si li phir aa ke meri jaan ke bich

ishq ne chuTkī sī lī phir aa ke merī jaañ ke biich

aag sī kuchh lag ga.ī hai sīna-e-bariyāñ ke biich

ahl-e-ma.ānī juz na būjhegā koī is ramz ko

ham ne paayā hai ḳhudā ko sūrat-e-insāñ ke biich

is sabab maiñ jañg shāne se karūñ huuñ baar baar

dil huā hai gum mirā us kākul-e-pechāñ ke biich

zulf o chashm o ḳhaal o ḳhat chāroñ haiñ dushman diin ke

haq rakkhe īmāñ salāmat aise kufristāñ ke biich

naqd-e-dil khoyā hai ham ne jaan kar is raah meñ

fil-haqīqat āshiqoñ ko suud hai nuqsāñ ke biich

gar adū merī badī kartā hai ḳhaas o aam meñ

maiñ use rusvā karūñgā bāñdh kar dīvāñ ke biich

raat din jaarī hai aalam meñ mirā faiz-e-suḳhan

go ki huuñ muhtāj par 'hātim' huuñ hindostāñ ke biich

ishq ne chuTki si li phir aa ke meri jaan ke bich

aag si kuchh lag gai hai sina-e-bariyan ke bich

ahl-e-maani juz na bujhega koi is ramz ko

hum ne paya hai KHuda ko surat-e-insan ke bich

is sabab main jang shane se karun hun bar bar

dil hua hai gum mera us kakul-e-pechan ke bich

zulf o chashm o KHal o KHat chaaron hain dushman din ke

haq rakkhe iman salamat aise kufristan ke bich

naqd-e-dil khoya hai hum ne jaan kar is rah mein

fil-haqiqat aashiqon ko sud hai nuqsan ke bich

gar adu meri badi karta hai KHas o aam mein

main use ruswa karunga bandh kar diwan ke bich

raat din jari hai aalam mein mera faiz-e-suKHan

go ki hun muhtaj par 'hatim' hun hindostan ke bich