ishq ne jab bhi kisi dil pe hukumat ki hai

ishq ne jab bhī kisī dil pe hukūmat kī hai

to use dard kī me.arāj ināyat kī hai

apnī tā.īd pe ḳhud aql bhī hairān huī

dil ne aise mire ḳhvāboñ kī himāyat kī hai

shahr-e-ehsās tirī yaad se raushan kar ke

maiñ ne har ghar meñ tire zikr kī jur.at kī hai

mujh ko lagtā hai ki insān adhūrā hai abhī

tū ne duniyā meñ use bhej ke ujlat kī hai

shahr ke tīra-tarīñ ghar se vo ḳhurshīd milā

jis kī tanvīr meñ tāsīr qayāmat kī hai

sochtā huuñ ki maiñ aise meñ kidhar ko jā.ūñ

terā milnā bhī kaThin, yaad bhī shiddat kī hai

is tarah auñdhe paḌe haiñ ye shikasta jazbe

jaise ik vahm ne in sab kī imāmat kī hai

ye jo bikhrī huī lāsheñ haiñ varaq par 'javvād'

ye mire zabt se lafzoñ ne baġhāvat kī hai

ishq ne jab bhi kisi dil pe hukumat ki hai

to use dard ki mearaj inayat ki hai

apni taid pe KHud aql bhi hairan hui

dil ne aise mere KHwabon ki himayat ki hai

shahr-e-ehsas teri yaad se raushan kar ke

main ne har ghar mein tere zikr ki jurat ki hai

mujh ko lagta hai ki insan adhura hai abhi

tu ne duniya mein use bhej ke ujlat ki hai

shahr ke tira-tarin ghar se wo KHurshid mila

jis ki tanwir mein tasir qayamat ki hai

sochta hun ki main aise mein kidhar ko jaun

tera milna bhi kaThin, yaad bhi shiddat ki hai

is tarah aundhe paDe hain ye shikasta jazbe

jaise ek wahm ne in sab ki imamat ki hai

ye jo bikhri hui lashen hain waraq par 'jawwad'

ye mere zabt se lafzon ne baghawat ki hai