ishq ne tere na jaane kya tamasha kar diya

ishq ne tere na jaane kyā tamāshā kar diyā

ek qatra thā maiñ lekin mujh ko dariyā kar diyā

jab junūñ merā baḌhā to us ne aisā kar diyā

un ko sharminda kiyā aur mujh ko rusvā kar diyā

ishq merā chhup nahīñ saktā chhupāne se mire

āñsuoñ ne ḳhuub bah kar is ko ifshā kar diyā

ek jalva jo kabhī tū ne dikhāyā thā mujhe

tere is jalve hī ne mahv-e-tamāshā kar diyā

kaun-sī thī vo ḳhatā jis kī mujhe dī ye sazā

bazm se tū ne uThā kar mujh ko rusvā kar diyā

ab talāsh-e-chāragar maiñ kyoñ karūñ aur kis liye

dard ne ab to mirā ḳhud hī mudāvā kar diyā

kyā zarūrat hai chhupāne kī mire qātil ko ab

ḳhuun ne us ko zabāñ se āshkāra kar diyā

maiñ bahut mamnūn-e-ehsāñ huuñ 'azīz' is ishq kā

jis ne mere qalb ko husn-e-mujalla kar diyā

ishq ne tere na jaane kya tamasha kar diya

ek qatra tha main lekin mujh ko dariya kar diya

jab junun mera baDha to us ne aisa kar diya

un ko sharminda kiya aur mujh ko ruswa kar diya

ishq mera chhup nahin sakta chhupane se mere

aansuon ne KHub bah kar is ko ifsha kar diya

ek jalwa jo kabhi tu ne dikhaya tha mujhe

tere is jalwe hi ne mahw-e-tamasha kar diya

kaun-si thi wo KHata jis ki mujhe di ye saza

bazm se tu ne uTha kar mujh ko ruswa kar diya

ab talash-e-chaaragar main kyon karun aur kis liye

dard ne ab to mera KHud hi mudawa kar diya

kya zarurat hai chhupane ki mere qatil ko ab

KHun ne us ko zaban se aashkara kar diya

main bahut mamnun-e-ehsan hun 'aziz' is ishq ka

jis ne mere qalb ko husn-e-mujalla kar diya