عشق پیشہ ہیں تو نقصان اٹھاتے رہیے

عشق پیشہ ہیں تو نقصان اٹھاتے رہیے

پاس جتنا بھی زر دل ہے لٹاتے رہیے

پیش خورشید کھلی رکھیے کتاب گلشن

آیت پارۂ گل روز سناتے رہیے

لکھ کے لے جائیے اک تازہ قصیدہ ہر روز

خلعت و منصب و زر شاہ سے پاتے رہیے

تیز ہے شعلۂ شب خاک نہ ہو جائیں مکاں

رات بھر سارے مکینوں کو جگاتے رہیے

رکھیے ہر حال میں یہ شمع تعلق روشن

اور لو اس کی جہاں تک ہو بڑھاتے رہیے

دام اس باغ سے جب تک نہ اٹھا لیں صیاد

ان پرندوں کو فضاؤں میں اڑاتے رہیے

تا نہ آئے کبھی خنجر کی روانی میں کمی

میرے سینے پہ نئے زخم لگاتے رہیے

ٹوٹنے دیجے نہ یہ سلسلۂ آمد نور

شمع ظلمت کدۂ شب میں جلاتے رہیے

ہم تو محکوم ہیں ہر ظلم پہ چپ ہیں اور آپ

حاکم شہر ہیں سو خون بہاتے رہیے

لوگ دیکھیں گے کہاں ایسے لہو کے منظر

سب کو اس شہر کی تصویر دکھاتے رہیے

ہو اگر حوصلہ تو کیجیے کج اپنی کلاہ

ورنہ سر جیسے جھکاتے ہیں جھکاتے رہیے

لشکر اس شہر کو ویران کیا چاہتے ہیں

آپ کو جشن منانا ہے مناتے رہیے