ishq-pesha hain to nuqsan uThate rahiye

'ishq-pesha haiñ to nuqsān uThāte rahiye

paas jitnā bhī zar-e-dil hai luTāte rahiye

pesh-e-ḳhurshīd khulī rakhiye kitāb-e-gulshan

āyat-e-pāra-e-gul roz sunāte rahiye

likh ke le jā.iye ik taaza qasīda har roz

ḳhil'at-o-mansab-o-zar shaah se paate rahiye

tez hai sho'la-e-shab ḳhaak na ho jaa.eñ makāñ

raat bhar saare makīnoñ ko jagāte rahiye

rakhiye har haal meñ ye sham’-e-ta’alluq raushan

aur lau is kī jahāñ tak ho baḌhāte rahiye

daam is baaġh se jab tak na uThā leñ sayyād

in parindoñ ko fazāoñ meñ uḌāte rahiye

tā na aa.e kabhī ḳhanjar kī ravānī meñ kamī

mere siine pe na.e zaḳhm lagāte rahiye

TūTne diije na ye silsila-e-āmad-e-nūr

sham' zulmat-kada-e-shab meñ jalāte rahiye

ham to mahkūm haiñ har zulm pe chup haiñ aur aap

hākim-e-shahr haiñ so ḳhuun bahāte rahiye

log dekheñge kahāñ aise lahū ke manzar

sab ko is shahr kī tasvīr dikhāte rahiye

ho agar hausla to kījiye kaj apnī kulāh

varna sar jaise jhukāte haiñ jhukāte rahiye

lashkar is shahr ko vīrān kiyā chāhte haiñ

aap ko jashn manānā hai manāte rahiye

'ishq-pesha hain to nuqsan uThate rahiye

pas jitna bhi zar-e-dil hai luTate rahiye

pesh-e-KHurshid khuli rakhiye kitab-e-gulshan

aayat-e-para-e-gul roz sunate rahiye

likh ke le jaiye ek taza qasida har roz

KHil'at-o-mansab-o-zar shah se pate rahiye

tez hai sho'la-e-shab KHak na ho jaen makan

raat bhar sare makinon ko jagate rahiye

rakhiye har haal mein ye sham’-e-ta’alluq raushan

aur lau is ki jahan tak ho baDhate rahiye

dam is bagh se jab tak na uTha len sayyaad

in parindon ko fazaon mein uDate rahiye

ta na aae kabhi KHanjar ki rawani mein kami

mere sine pe nae zaKHm lagate rahiye

TuTne dije na ye silsila-e-amad-e-nur

sham' zulmat-kada-e-shab mein jalate rahiye

hum to mahkum hain har zulm pe chup hain aur aap

hakim-e-shahr hain so KHun bahate rahiye

log dekhenge kahan aise lahu ke manzar

sab ko is shahr ki taswir dikhate rahiye

ho agar hausla to kijiye kaj apni kulah

warna sar jaise jhukate hain jhukate rahiye

lashkar is shahr ko viran kiya chahte hain

aap ko jashn manana hai manate rahiye