ishq phir rang wo laya hai ki ji jaane hai

ishq phir rañg vo laayā hai ki jī jaane hai

dil kā ye rañg banāyā hai ki jī jaane hai

naaz uThāne meñ jafā.eñ to uThā.īñ lekin

lutf bhī aisā uThāyā hai ki jī jaane hai

zaḳhm us teġh-e-nigah kā mire dil ne hañs kar

is maze-dārī se khāyā hai ki jī jaane hai

us kī duzdīda nigah ne mire dil meñ chhup kar

tiir is Dhab se lagāyā hai ki jī jaane hai

baam par chaḌh ke tamāshe ko hameñ husn apnā

is tamāshe se dikhāyā hai ki jī jaane hai

us kī furqat meñ hameñ charḳh-e-sitamgār ne aah

ye rulāyā, ye rulāyā hai ki jī jaane hai

hukm chuppī kā huā shab to sahar tak ham ne

ratjagā aisā manāyā hai ki jī jaane hai

talve sahlāne meñ go uuñgh ke jhuk jhuk to paḌe

par mazā bhī vo uḌāyā hai ki jī jaane hai

rañj milne ke bahut dil ne sahe lek 'nazīr'

yaar bhī aisā milāyā hai ki jī jaane hai

ishq phir rang wo laya hai ki ji jaane hai

dil ka ye rang banaya hai ki ji jaane hai

naz uThane mein jafaen to uThain lekin

lutf bhi aisa uThaya hai ki ji jaane hai

zaKHm us tegh-e-nigah ka mere dil ne hans kar

is maze-dari se khaya hai ki ji jaane hai

us ki duzdida nigah ne mere dil mein chhup kar

tir is Dhab se lagaya hai ki ji jaane hai

baam par chaDh ke tamashe ko hamein husn apna

is tamashe se dikhaya hai ki ji jaane hai

us ki furqat mein hamein charKH-e-sitamgar ne aah

ye rulaya, ye rulaya hai ki ji jaane hai

hukm chuppi ka hua shab to sahar tak hum ne

ratjaga aisa manaya hai ki ji jaane hai

talwe sahlane mein go ungh ke jhuk jhuk to paDe

par maza bhi wo uDaya hai ki ji jaane hai

ranj milne ke bahut dil ne sahe lek 'nazir'

yar bhi aisa milaya hai ki ji jaane hai