ishq ruswa sar-e-bazar hua hai kya kya

ishq rusvā sar-e-bāzār huā hai kyā kyā

roz jashn-e-rasan-o-dār huā hai kyā kyā

ta.ana-o-tanz kī parvā na malāmat kā ḳhayāl

jī tire ishq meñ nā-chār huā hai kyā kyā

kitne hī nāseh-e-mushfiq phire nākām na pūchh

chuur ā.īna-e-pindār huā hai kyā kyā

terī furqat tirā milnā to baḌī baat na thī

kaam jo sahl thā dushvār huā hai kyā kyā

ham jo us bazm ko Thukrā ke chale aa.e haiñ

ham pe nāzāñ dil-e-ḳhuddār huā hai kyā kyā

fikr-e-āġhāz 'payām' aur na anjām kā ġham

ham pe ehsān-e-ġham-e-yār huā hai kyā kyā

ishq ruswa sar-e-bazar hua hai kya kya

roz jashn-e-rasan-o-dar hua hai kya kya

tana-o-tanz ki parwa na malamat ka KHayal

ji tere ishq mein na-chaar hua hai kya kya

kitne hi naseh-e-mushfiq phire nakaam na puchh

chur aaina-e-pindar hua hai kya kya

teri furqat tera milna to baDi baat na thi

kaam jo sahl tha dushwar hua hai kya kya

hum jo us bazm ko Thukra ke chale aae hain

hum pe nazan dil-e-KHuddar hua hai kya kya

fikr-e-aghaz 'payam' aur na anjam ka gham

hum pe ehsan-e-gham-e-yar hua hai kya kya