عشق رسوا سر بازار ہوا ہے کیا کیا

عشق رسوا سر بازار ہوا ہے کیا کیا

روز جشن رسن و دار ہوا ہے کیا کیا

طعنہ و طنز کی پروا نہ ملامت کا خیال

جی ترے عشق میں ناچار ہوا ہے کیا کیا

کتنے ہی ناصح مشفق پھرے ناکام نہ پوچھ

چور آئینۂ پندار ہوا ہے کیا کیا

تیری قربت ترا ملنا تو بڑی بات نہ تھی

کام جو سہل تھا دشوار ہوا ہے کیا کیا

ہم جو اس بزم کو ٹھکرا کے چلے آئے ہیں

ہم پہ نازاں دل خوددار ہوا ہے کیا کیا

فکر آغاز پیامؔ اور نہ انجام کا غم

ہم پہ احسان غم یار ہوا ہے کیا کیا