ishq sadiq ho to KHuddar-numa hota hai

ishq sādiq ho to ḳhud.dār-numā hotā hai

ḳhizr bhī varna jo mil jaa.e to kyā hotā hai

aur to aap se ai vā.izo kyā hotā hai

ek le de ke jahannum kā bhalā hotā hai

dil jo āmāda-e-iz.hār-e-jafā hotā hai

ḳhanda-zan sheva-e-arbāb-e-vafā hotā hai

but bane baiThe haiñ but kahiye to hote haiñ ḳhafā

ye samajhte haiñ ki patthar to ḳhudā hotā hai

kabhī is phuul ko chheḌā kabhī us ko jhaTkā

aur kyā kaam tirā bād-e-sabā hotā hai

arsa-e-ishq nahīñ ahl-e-havas kā maidāñ

zikr-e-ḳhanjar hī se dam un kā fanā hotā hai

diin kī aaḌ meñ duniyā ko kamāne vaale

dekhnā hashr ke maidān meñ kyā hotā hai

aaj us dar pe hai kal us pe hai parsoñ us par

māl-o-iqbāl haqīqat meñ gadā hotā hai

dekh kar rang-e-harīfān-e-zamāna 'shāġhil'

shikva hotā hai magar shikve se kyā hotā hai

ishq sadiq ho to KHuddar-numa hota hai

KHizr bhi warna jo mil jae to kya hota hai

aur to aap se ai waizo kya hota hai

ek le de ke jahannum ka bhala hota hai

dil jo aamada-e-izhaar-e-jafa hota hai

KHanda-zan shewa-e-arbab-e-wafa hota hai

but bane baiThe hain but kahiye to hote hain KHafa

ye samajhte hain ki patthar to KHuda hota hai

kabhi is phul ko chheDa kabhi us ko jhaTka

aur kya kaam tera baad-e-saba hota hai

arsa-e-ishq nahin ahl-e-hawas ka maidan

zikr-e-KHanjar hi se dam un ka fana hota hai

din ki aaD mein duniya ko kamane wale

dekhna hashr ke maidan mein kya hota hai

aaj us dar pe hai kal us pe hai parson us par

mal-o-iqbaal haqiqat mein gada hota hai

dekh kar rang-e-harifan-e-zamana 'shaghil'

shikwa hota hai magar shikwe se kya hota hai