ishq taron se na mahtab se dildari ki

'ishq tāroñ se na mahtāb se dildārī kī

raat ne dhuup ke bistar pe siyah-kārī kī

maiñ vo dahqān-e-junūñ-ḳhez huuñ jis ne apne

jism ke khet meñ zaḳhmoñ kī shajar-kārī kī

muddatoñ laTkī rahī mom kī zanjīr se laash

barf ke sūkhe hue peḌ pe chingārī kī

chand sāñsoñ ke liye apnā mudāvā kar ke

tū ne amrāz-e-ḳhudā-dād se ġhaddārī kī

kuchh taġhayyur kī ye rāteñ bhī bahut lambī haiñ

kuchh mirī qaum ko 'ādat nahīñ bedārī kī

suī ke chhed se hāthī kā guzar mumkin hai

ise kahte haiñ taḳhayyul kī bahut bārīkī

tum ne lafzoñ kī numā.ish pe faqat dhyān diyā

maiñ ne kāġhaz ke hasīñ jism pe gul-kārī kī

ruuh par itr lagā ke mire paas aayā kar

tere kirdār se bū aatī hai makkārī kī

bazm-e-dānish meñ na muñh kholnā apnā 'hasrat'

tujh se ummīd nahīñ mujh ko samajhdārī kī

'ishq taron se na mahtab se dildari ki

raat ne dhup ke bistar pe siyah-kari ki

main wo dahqan-e-junun-KHez hun jis ne apne

jism ke khet mein zaKHmon ki shajar-kari ki

muddaton laTki rahi mom ki zanjir se lash

barf ke sukhe hue peD pe chingari ki

chand sanson ke liye apna mudawa kar ke

tu ne amraaz-e-KHuda-dad se ghaddari ki

kuchh taghayyur ki ye raaten bhi bahut lambi hain

kuchh meri qaum ko 'adat nahin bedari ki

sui ke chhed se hathi ka guzar mumkin hai

ise kahte hain taKHayyul ki bahut bariki

tum ne lafzon ki numaish pe faqat dhyan diya

main ne kaghaz ke hasin jism pe gul-kari ki

ruh par itr laga ke mere pas aaya kar

tere kirdar se bu aati hai makkari ki

bazm-e-danish mein na munh kholna apna 'hasrat'

tujh se ummid nahin mujh ko samajhdari ki