bistar dhul aur KHushbu wahi purani hai

bistar dhuul aur ḳhushbū vahī purānī hai

us kamre kī apnī ek kahānī hai

muddat baa'd kahīñ sannāTā bolā hai

ye aahaT kitnī jānī-pahchānī hai

do jaltī-bujhtī āñkheñ aur maiñ aur tum

bachpan hai aur raat hai aur kahānī hai

sair karā.e roz ik uḌan-khaTole meñ

yaad bhī jaise merī būḌhī naanī hai

ḳhud ko maiñ ne qaid kiyā hai kamre meñ

maiñ ne hī khiḌkī par chādar taanī hai

aañkh pe paTTī bāñdh ke bhī chal saktī hai

beTī merī mujh se bahut siyānī hai

chiḌiyoñ ko to shor machānā aatā hai

peḌ ko lekin apnī riit nibhānī hai

bachchoñ se to ham ko shikva rahtā hai

aage kis ne baat baḌoñ kī maanī hai

dariyā hai to ik din rasta badlegā

kab dariyā ne baat kisī kī maanī hai

un rastoñ kā apnā ek andāza hai

un galiyoñ kī apnī ek nishānī hai

ab ye dil bhī kitnā bojh sahāregā

maan bhī jaao kashtī bahut purānī hai

mausam shāyad āḳhirī hichkī letā hai

ye jo lahū ke dariyā meñ tuġhyānī hai

sar Takrātā rahtā hai dīvāroñ se

mere andar bhī koī zindagānī hai

'ishq meñ ham ne kyā khoyā aur kyā paayā

mat pūchho pyāre qissa tūlānī hai

shaam ke saath na jaanā tanhā mele meñ

kho jāoge shaam bahut sailānī hai

aag bacha kar rakhnā apne hisse kī

aane vaalī raat baḌī barfānī hai

terī ḳhātir kitnā ḳhud ko badal diyā

apne uupar mujh ko bhī hairānī hai

bistar dhul aur KHushbu wahi purani hai

us kamre ki apni ek kahani hai

muddat ba'd kahin sannaTa bola hai

ye aahaT kitni jaani-pahchani hai

do jalti-bujhti aankhen aur main aur tum

bachpan hai aur raat hai aur kahani hai

sair karae roz ek uDan-khaTole mein

yaad bhi jaise meri buDhi nani hai

KHud ko main ne qaid kiya hai kamre mein

main ne hi khiDki par chadar tani hai

aankh pe paTTi bandh ke bhi chal sakti hai

beTi meri mujh se bahut siyani hai

chiDiyon ko to shor machana aata hai

peD ko lekin apni rit nibhani hai

bachchon se to hum ko shikwa rahta hai

aage kis ne baat baDon ki mani hai

dariya hai to ek din rasta badlega

kab dariya ne baat kisi ki mani hai

un raston ka apna ek andaza hai

un galiyon ki apni ek nishani hai

ab ye dil bhi kitna bojh sahaarega

man bhi jao kashti bahut purani hai

mausam shayad aaKHiri hichki leta hai

ye jo lahu ke dariya mein tughyani hai

sar Takraata rahta hai diwaron se

mere andar bhi koi zindagani hai

'ishq mein hum ne kya khoya aur kya paya

mat puchho pyare qissa tulani hai

sham ke sath na jaana tanha mele mein

kho jaoge sham bahut sailani hai

aag bacha kar rakhna apne hisse ki

aane wali raat baDi barfani hai

teri KHatir kitna KHud ko badal diya

apne upar mujh ko bhi hairani hai