KHwab aankhon se hathon se phul aur charagh aur dua le gae

ḳhvāb āñkhoñ se hāthoñ se phuul aur charāġh aur du'ā le ga.e

ab ke ye sang-zan chhīn kar hī mirā aa.ina le ga.e

mauj-e-ḳhūñ-nāb jab sar se ūñchī huī is tarah bhī huā

shahryāroñ kī dastār ḳhāshāk mil kar bahā le ga.e

yaañ kitāb-e-mohabbat to bas taaq meñ juuñ kī tuuñ rah ga.ī

asl aurāq jo the vo dushman hamāre uḌā le ga.e

jis ḳhazāne pe sāhil samundar se is darja nārāz thā

shab ke qazzāq aa.e aur aa kar vo daulat uThā le ga.e

she'r paiġhambaroñ kī tarah se utarte haiñ ab bhī magar

mere kizb-o-riyā dast-e-taḳhlīq se mo'jiza le ga.e

ik tavātur se bārish zamīñ ko musalsal bhigotī to hai

mere ā'māl āb-o-namak se magar zā.iqa le ga.e

avval ahl-e-qabīla ne parcham banāyā use aur phir

pesh-e-dushman bhī tāvān meñ sirf merī ridā le ga.e

KHwab aankhon se hathon se phul aur charagh aur du'a le gae

ab ke ye sang-zan chhin kar hi mera aaina le gae

mauj-e-KHun-nab jab sar se unchi hui is tarah bhi hua

shahryaron ki dastar KHashak mil kar baha le gae

yan kitab-e-mohabbat to bas taq mein jun ki tun rah gai

asl auraq jo the wo dushman hamare uDa le gae

jis KHazane pe sahil samundar se is darja naraaz tha

shab ke qazzaq aae aur aa kar wo daulat uTha le gae

she'r paighambaron ki tarah se utarte hain ab bhi magar

mere kizb-o-riya dast-e-taKHliq se mo'jiza le gae

ek tawatur se barish zamin ko musalsal bhigoti to hai

mere aa'mal aab-o-namak se magar zaiqa le gae

awwal ahl-e-qabila ne parcham banaya use aur phir

pesh-e-dushman bhi tawan mein sirf meri rida le gae