ishrat-e-haal mein andesha-e-farda karna

ishrat-e-hāl meñ andesha-e-fardā karnā

mere mashrab meñ nahīñ ye ġham-e-bejā karnā

fikr-e-anjām nahīñ farz kisī mai-kash par

haañ magar bāda-e-āġhāz kī parvā karnā

mahv-e-nazzāra zamāna hai magar hāsil-e-dīd

aisā āsāñ nahīñ duniyā kā nazārā karnā

hāsil-e-zīst hai kyā mai-kada-e-hastī meñ

talḳhī-e-bāda-e-ummīd gavārā karnā

dekh ai be-ḳhudī-e-shauq-e-parastish hoshiyār

husn-e-ḳhuddār ko mahfil meñ na rusvā karnā

laakh ma.ayūb na ho phir bhī nahīñ mustahsan

hazrat-e-dost meñ iz.hār-e-tamannā karnā

sau tarīqe haiñ parastish ke agar zauq ho kuchh

kyā baḌī baat hai koī use sajda karnā

tark-e-mai kufr hai ai 'rāz' mire mashrab meñ

ain īmāñ hai sar-e-sāġhar-o-mīnā karnā

ishrat-e-haal mein andesha-e-farda karna

mere mashrab mein nahin ye gham-e-beja karna

fikr-e-anjam nahin farz kisi mai-kash par

han magar baada-e-aghaz ki parwa karna

mahw-e-nazzara zamana hai magar hasil-e-did

aisa aasan nahin duniya ka nazara karna

hasil-e-zist hai kya mai-kada-e-hasti mein

talKHi-e-baada-e-ummid gawara karna

dekh ai be-KHudi-e-shauq-e-parastish hoshiyar

husn-e-KHuddar ko mahfil mein na ruswa karna

lakh mayub na ho phir bhi nahin mustahsan

hazrat-e-dost mein izhaar-e-tamanna karna

sau tariqe hain parastish ke agar zauq ho kuchh

kya baDi baat hai koi use sajda karna

tark-e-mai kufr hai ai 'raaz' mere mashrab mein

ain iman hai sar-e-saghar-o-mina karna