isi bazar tak bas raushni hai

isī bāzār tak bas raushnī hai

phir is ke ba.ad ik andhī galī hai

har ik āvāz meñ hai ajnabiyyat

har ik chehre pe ik be-chehragī hai

yahāñ rasman hai sab kī ḳhush-libāsī

nazar se be-libāsī jhāñktī hai

hai ghar meñ ḳhāmushī kā ek jañgal

isī jañgal meñ kaalā naag bhī hai

ajab durgandh hai vātāvaran meñ

kisī tālāb meñ machhlī marī hai

hameñ ākāsh par jaanā thā lekin

hamāre paañv meñ rassī bañdhī hai

zarā lahje ko tum shā.ista kar lo

tumhāre pīchhe ik laḌkī khaḌī hai

vo chehrā jo kabhī dekhā nahīñ thā

vo chehrā yaad mujh ko aaj bhī hai

abhī haiñ ḳhvāb giile bādaloñ ke

abhī bārish meñ laḌkī bhīgtī hai

isi bazar tak bas raushni hai

phir is ke baad ek andhi gali hai

har ek aawaz mein hai ajnabiyyat

har ek chehre pe ek be-chehragi hai

yahan rasman hai sab ki KHush-libasi

nazar se be-libasi jhankti hai

hai ghar mein KHamushi ka ek jangal

isi jangal mein kala nag bhi hai

ajab durgandh hai watawaran mein

kisi talab mein machhli mari hai

hamein aakash par jaana tha lekin

hamare panw mein rassi bandhi hai

zara lahje ko tum shaista kar lo

tumhaare pichhe ek laDki khaDi hai

wo chehra jo kabhi dekha nahin tha

wo chehra yaad mujh ko aaj bhi hai

abhi hain KHwab gile baadalon ke

abhi barish mein laDki bhigti hai