isi jahaz ke sahra mein Dub jaane ki

isī jahāz ke sahrā meñ Duub jaane kī

ḳhabar milī thī mujhe ḳhvāb meñ ḳhazāne kī

bahut se diida o nādīda ḳhvāb sāmne the

ik aisī samt thī karvaT mire sirhāne kī

maiñ is jagah pe jo ik din palaT ke aayā to

koī bhī chiiz nahīñ thī mire zamāne kī

har ek kaam suhūlat se hotā rahtā thā

koī ḳhalish nahīñ hotī thī kar dikhāne kī

maiñ ik ḳhayāl kā ḳhema lagā.e baiThā thā

bahut jagah thī mire paas sar chhupāne kī

vo kyā ḳhushī thī jo dil meñ bahāl rahtī thī

magar vaj.h nahīñ bantī thī muskurāne kī

ik aise vaqt meñ vo donoñ ho ga.e ābād

jahāñ kisī ko ijāzat nahīñ thī aane kī

'ajīb dasht thā jo mujh se daad chāhtā thā

qarīb phaile hue duur ke zamāne kī

tamām shahr meñ puurī tarah ḳhamoshī thī

mujhe paḌī thī koī giit gungunāne kī

isi jahaz ke sahra mein Dub jaane ki

KHabar mili thi mujhe KHwab mein KHazane ki

bahut se dida o nadida KHwab samne the

ek aisi samt thi karwaT mere sirhane ki

main is jagah pe jo ek din palaT ke aaya to

koi bhi chiz nahin thi mere zamane ki

har ek kaam suhulat se hota rahta tha

koi KHalish nahin hoti thi kar dikhane ki

main ek KHayal ka KHema lagae baiTha tha

bahut jagah thi mere pas sar chhupane ki

wo kya KHushi thi jo dil mein bahaal rahti thi

magar wajh nahin banti thi muskurane ki

ek aise waqt mein wo donon ho gae aabaad

jahan kisi ko ijazat nahin thi aane ki

'ajib dasht tha jo mujh se dad chahta tha

qarib phaile hue dur ke zamane ki

tamam shahr mein puri tarah KHamoshi thi

mujhe paDi thi koi git gungunane ki