isi ka nam hai diwana banna aur bana dena

isī kā naam hai dīvāna banñā aur banā denā

butoñ ke sāmne jā kar ḳhudā kā vāsta denā

nigāh-e-shauq kā baḌh kar naqāb-e-ruḳh uThā denā

tire jalve kā barham ho ke ik bijlī girā denā

ḳhudā.ī hī ḳhudā kī ḳhaak se insāñ banā denā

tumhārā khel hai insāñ ko miTTī meñ milā denā

maiñ apnī dāstān-e-dard-e-dil ro ro ke kahtā huuñ

jahāñ se chāhnā tum sunte sunte muskurā denā

mazāq-e-shikva achchhā hai magar ik shart hī ai dil

yahāñ jo yaad kar lenā vahāñ jā kar bhulā denā

vafā be-shak jafāoñ kā badal hai lekin ai zālim

bahut mushkil hai mujh se rone vaale ko hañsā denā

zabāñ ko shikva-sanjī kā mazā hī baat kahne do

maiñ tum se ye nahīñ kahtā ki tum dād-e-vafā denā

yahī ma.anī haiñ ai 'shaukat' buland-o-past ke shāyad

nigāhoñ par chaḌhānā aur nazroñ se girā denā

isi ka nam hai diwana banna aur bana dena

buton ke samne ja kar KHuda ka wasta dena

nigah-e-shauq ka baDh kar naqab-e-ruKH uTha dena

tere jalwe ka barham ho ke ek bijli gira dena

KHudai hi KHuda ki KHak se insan bana dena

tumhaara khel hai insan ko miTTi mein mila dena

main apni dastan-e-dard-e-dil ro ro ke kahta hun

jahan se chahna tum sunte sunte muskura dena

mazaq-e-shikwa achchha hai magar ek shart hi ai dil

yahan jo yaad kar lena wahan ja kar bhula dena

wafa be-shak jafaon ka badal hai lekin ai zalim

bahut mushkil hai mujh se rone wale ko hansa dena

zaban ko shikwa-sanji ka maza hi baat kahne do

main tum se ye nahin kahta ki tum dad-e-wafa dena

yahi mani hain ai 'shaukat' buland-o-past ke shayad

nigahon par chaDhana aur nazron se gira dena