isi KHayal isi gham mein Dhal gaya hun main

isī ḳhayāl isī ġham meñ Dhal gayā huuñ maiñ

badal ga.e ho tumhīñ yā badal gayā huuñ maiñ

tirī nazar kā ye ehsān kaun bhūlegā

ki laġhzishoñ kī badaulat sañbhal gayā huuñ maiñ

gale lagā liyā ḳhud sho.ala-e-mohabbat ko

ajiib baat hai dānista jal gayā huuñ maiñ

nazar zamāne kī chhoḌ aa.ī thī jahāñ mujh ko

ab is maqām se aage nikal gayā huuñ maiñ

mirā vajūd bhī ab hai mirī hayāt pe baar

ajab nahīñ ki zamīñ ko bhī khal gayā huuñ maiñ

jahāñ kisī ne mohabbat se mujh ko yaad kiyā

ba-sad-ḳhulūs vahāñ sar ke bal gayā huuñ maiñ

'shafaq' pasīne pasīne hue vo jaane kyoñ

kabhī jo thaam ke dāman machal gayā huuñ maiñ

isi KHayal isi gham mein Dhal gaya hun main

badal gae ho tumhin ya badal gaya hun main

teri nazar ka ye ehsan kaun bhulega

ki laghzishon ki badaulat sanbhal gaya hun main

gale laga liya KHud shoala-e-mohabbat ko

ajib baat hai danista jal gaya hun main

nazar zamane ki chhoD aai thi jahan mujh ko

ab is maqam se aage nikal gaya hun main

mera wajud bhi ab hai meri hayat pe bar

ajab nahin ki zamin ko bhi khal gaya hun main

jahan kisi ne mohabbat se mujh ko yaad kiya

ba-sad-KHulus wahan sar ke bal gaya hun main

'shafaq' pasine pasine hue wo jaane kyon

kabhi jo tham ke daman machal gaya hun main