isi liye hamein ehsas-e-bewafai nahin

isī liye hameñ ehsās-e-bevafā.ī nahīñ

hamāre paas haiñ kangan koī kalā.ī nahīñ

yahī sabab hai ki be-rang ho ga.e sab ḳhvāb

hamārī āñkhoñ meñ kājal thā raushnā.ī nahīñ

mohabbatoñ ke safar meñ mohabbatoñ ke sivā

hamāre paas koī dūsrī kamā.ī nahīñ

us ik nigāh kā tarz-e-bayān aisā thā

kisī kī baat hamārī samajh meñ aa.ī nahīñ

chamak hai us ke har ik misra-e-badan pe magar

mirī ġhazal ko koī detā muñh-dikhā.ī nahīñ

ham apne ahd ke suqrāt haiñ hamāre yahāñ

koī bhī guftugū hogī havā-havā.ī nahīñ

vahāñ pahuñch ke bhī hāsil huā hai 'faiz' mujhe

jahāñ kisī se mirī koī āshnā.ī nahīñ

isi liye hamein ehsas-e-bewafai nahin

hamare pas hain kangan koi kalai nahin

yahi sabab hai ki be-rang ho gae sab KHwab

hamari aankhon mein kajal tha raushnai nahin

mohabbaton ke safar mein mohabbaton ke siwa

hamare pas koi dusri kamai nahin

us ek nigah ka tarz-e-bayan aisa tha

kisi ki baat hamari samajh mein aai nahin

chamak hai us ke har ek misra-e-badan pe magar

meri ghazal ko koi deta munh-dikhai nahin

hum apne ahd ke suqraat hain hamare yahan

koi bhi guftugu hogi hawa-hawai nahin

wahan pahunch ke bhi hasil hua hai 'faiz' mujhe

jahan kisi se meri koi aashnai nahin