اسی رنگ کیف و نشاط میں شب ماہتاب گزر گئی

اسی رنگ کیف و نشاط میں شب ماہتاب گزر گئی

کبھی لب پہ غنچے چٹک اٹھے کبھی رخ پہ زلف بکھر گئی

وہ قرار روح و نظر گیا وہ بہار شام و سحر گئی

ذرا آنکھ جھپکی تھی ایک پل کہ وہ زندگی ہی گزر گئی

کبھی پھول پھول چمن چمن کبھی چاند تاروں کی انجمن

تری جستجو میں کہاں کہاں مجھے لے کے میری نظر گئی

پھر اسی نظر کی ہے آرزو پھر اسی کرن کی ہے جستجو

جو سما گئی مری روح میں جو دل و جگر میں اتر گئی

تری ہر صدا میں ہے زندگی تری ہر ادا میں ہے دل کشی

تری جاں فروز نگاہ سے مری کائنات سنور گئی

ہے کہاں جہان سکون دل نہ ملا نشان سکون دل

کہ سکون دل کی تلاش میں مری ایک عمر گزر گئی

ترے دل کو مضطرؔ غم زدہ یہ بتائے کون کہ کیا ہوا

وہ خوشی کا دور کہاں گیا وہ بہار عیش کدھر گئی