isi rang-e-kaif-o-nashat mein shab-e-mahtab guzar gai

isī rang-e-kaif-o-nashāt meñ shab-e-māhtāb guzar ga.ī

kabhī lab pe ġhunche chaTak uThe kabhī ruḳh pe zulf bikhar ga.ī

vo qarār-e-rūh-o-nazar gayā vo bahār-e-shām-o-sahar ga.ī

zarā aañkh jhapkī thī ek pal ki vo zindagī hī guzar ga.ī

kabhī phuul phuul chaman chaman kabhī chāñd tāroñ kī anjuman

tirī justujū meñ kahāñ kahāñ mujhe le ke merī nazar ga.ī

phir usī nazar kī hai aarzū phir usī kiran kī hai justujū

jo samā ga.ī mirī ruuh meñ jo dil-o-jigar meñ utar ga.ī

tirī har sadā meñ hai zindagī tirī har adā meñ hai dilkashī

tirī jāñ-faroz nigāh se mirī kā.enāt sañvar ga.ī

hai kahāñ jahān-e-sukūn-e-dil na milā nishān-e-sukūn-e-dil

ki sukūn-e-dil kī talāsh meñ mirī ek 'umr guzar ga.ī

tire dil ko 'muztar'-e-ġham-zada ye batā.e kaun ki kyā huā

vo ḳhushī kā daur kahāñ gayā vo bahār-e-'aish kidhar ga.ī

isi rang-e-kaif-o-nashat mein shab-e-mahtab guzar gai

kabhi lab pe ghunche chaTak uThe kabhi ruKH pe zulf bikhar gai

wo qarar-e-ruh-o-nazar gaya wo bahaar-e-sham-o-sahar gai

zara aankh jhapki thi ek pal ki wo zindagi hi guzar gai

kabhi phul phul chaman chaman kabhi chand taron ki anjuman

teri justuju mein kahan kahan mujhe le ke meri nazar gai

phir usi nazar ki hai aarzu phir usi kiran ki hai justuju

jo sama gai meri ruh mein jo dil-o-jigar mein utar gai

teri har sada mein hai zindagi teri har ada mein hai dilkashi

teri jaan-faroz nigah se meri kaenat sanwar gai

hai kahan jahan-e-sukun-e-dil na mila nishan-e-sukun-e-dil

ki sukun-e-dil ki talash mein meri ek 'umr guzar gai

tere dil ko 'muztar'-e-gham-zada ye batae kaun ki kya hua

wo KHushi ka daur kahan gaya wo bahaar-e-'aish kidhar gai