isi sabab se to hum log pesh-o-pas mein hain

isī sabab se to ham log pesh-o-pas meñ haiñ

usī se bair bhī hai aur usī ke bas meñ haiñ

qafas meñ the to gumāñ thā khulī fazāoñ kā

khulī fazā meñ ye ehsās ham qafas meñ haiñ

ye aur baat ki ham fā.eda uThā na sakeñ

kuchh aise log hamārī bhī dastaras meñ haiñ

har ek shahr kī kaayā palaT ga.ī lekin

har ek shahr meñ baaqī purānī rasmeñ haiñ

haqīqatoñ se nigāheñ milā.iye 'iqbāl'

sunā hai aap to chālīsveñ baras meñ haiñ

isi sabab se to hum log pesh-o-pas mein hain

usi se bair bhi hai aur usi ke bas mein hain

qafas mein the to guman tha khuli fazaon ka

khuli faza mein ye ehsas hum qafas mein hain

ye aur baat ki hum faeda uTha na saken

kuchh aise log hamari bhi dastaras mein hain

har ek shahr ki kaya palaT gai lekin

har ek shahr mein baqi purani rasmen hain

haqiqaton se nigahen milaiye 'iqbaal'

suna hai aap to chaaliswen baras mein hain