اسی صورت ہم اپنا راز دل شاید نہاں کر لیں

اسی صورت ہم اپنا راز دل شاید نہاں کر لیں

زمانے بھر کو اپنے آپ سے ہم بد گماں کر لیں

فریب عشق کا مارا ہوا گم کردہ منزل ہوں

شریک اپنا کہیں مجھ کو نہ اہل کارواں کر لیں

تماشہ ہی اگر مقصود ہے اس حسن پیکر کا

تو اپنا دل تو اس قابل ذرا اہل جہاں کر لیں

حرم کا شیخ کو اور برہمن کو دیر کا دعویٰ

تمہاری کس جگہ تخصیص اے جان جہاں کر لیں

اگر اہل حرم چاہیں خدا کو مہرباں کرنا

تو مے خانے میں آکر بیعت پیر مغاں کر لیں

وہاں پہنچاؤں لے جا کر جہاں منزل ہی منزل ہو

جو اہل کارواں مجھ کو ہی میر کارواں کر لیں

ادھر موج تبسم اور ادھر انگڑائیاں ان کی

بتاؤ آرزوؔ اب صبر کا کیسے گماں کر لیں