ism paDha aur jism se uTh kar ishq uThaya

ism paḌhā aur jism se uTh kar ishq uThāyā

dil darvesh ne mast qalandar ishq uThāyā

farsh pe arsh ke baad mukarrar ishq uThāyā

ruuh ne ab ke jism ke andar ishq uThāyā

shā.ir suufī falsafa-dān valī paiġhambar

sab ne apne zarf barābar ishq uThāyā

niiñd se jaage sar par duniyā-dārī Dhoī

aañkh lagī aur ḳhvāb ke andar ishq uThāyā

us ko ishq ḳhud aap uThā kar le gayā aage

jis ne himmat kī aur baḌh kar ishq uThāyā

sachchā jhūTā ḳhaam haqīqī aur majāzī

lekin ham ne sab se behtar ishq uThāyā

jis din sab apne hāthoñ meñ naame laa.e

ham ne to us din bhī sar par ishq uThāyā

hazrat-e-qais ne ḳhud aa kar gaThḌī uThvā.ī

maiñ ne jab apne kāñdhoñ par ishq uThāyā

ek badan do jism huā thā jis ḳhvāhish par

us ḳhvāhish ne paikar paikar ishq uThāyā

ye dīvāngī dīvane-pan se nahīñ aa.ī

ham ne 'ahmad' soch-samajh kar ishq uThāyā

ism paDha aur jism se uTh kar ishq uThaya

dil darwesh ne mast qalandar ishq uThaya

farsh pe arsh ke baad mukarrar ishq uThaya

ruh ne ab ke jism ke andar ishq uThaya

shair sufi falsafa-dan wali paighambar

sab ne apne zarf barabar ishq uThaya

nind se jage sar par duniya-dari Dhoi

aankh lagi aur KHwab ke andar ishq uThaya

us ko ishq KHud aap uTha kar le gaya aage

jis ne himmat ki aur baDh kar ishq uThaya

sachcha jhuTa KHam haqiqi aur majazi

lekin hum ne sab se behtar ishq uThaya

jis din sab apne hathon mein name lae

hum ne to us din bhi sar par ishq uThaya

hazrat-e-qais ne KHud aa kar gaThDi uThwai

main ne jab apne kandhon par ishq uThaya

ek badan do jism hua tha jis KHwahish par

us KHwahish ne paikar paikar ishq uThaya

ye diwangi diwane-pan se nahin aai

hum ne 'ahmad' soch-samajh kar ishq uThaya