israr-o-inkisar se wo man to gaya

isrār-o-inkisār se vo maan to gayā

lekin maiñ is tarah se use jaan to gayā

kī us ne go talāfī-e-māfāt bārhā

lekin jo us pe maan thā vo maan to gayā

ye baat aur hai vo chamak aañkh meñ na thī

itnā bahut hai mil ke vo pahchān to gayā

achchhā huā vo chashm-e-karam ho ga.ī ḳhafā

sar se ye roz roz kā ehsān to gayā

ik naqd-e-jāñ hai aur pas-e-gard-e-rahguzār

baiThe haiñ pā-rikāb ki sāmān to gayā

phailā ke paañv baiTh farāġh-e-hayāt ab

ghar se tire ye roz kā mehmān to gayā

duniyā milī ki diin par itnā zarūr hai

is kashmakash meñ 'shaiḳh' kā īmān to gayā

israr-o-inkisar se wo man to gaya

lekin main is tarah se use jaan to gaya

ki us ne go talafi-e-mafat barha

lekin jo us pe man tha wo man to gaya

ye baat aur hai wo chamak aankh mein na thi

itna bahut hai mil ke wo pahchan to gaya

achchha hua wo chashm-e-karam ho gai KHafa

sar se ye roz roz ka ehsan to gaya

ek naqd-e-jaan hai aur pas-e-gard-e-rahguzar

baiThe hain pa-rikab ki saman to gaya

phaila ke panw baiTh faragh-e-hayat ab

ghar se tere ye roz ka mehman to gaya

duniya mili ki din par itna zarur hai

is kashmakash mein 'shaiKH' ka iman to gaya