itna bhi ho na zauq-e-tajassus nigah mein

itnā bhī ho na zauq-e-tajassus nigāh meñ

haa.il raheñ ḳhud aap hamīñ apnī raah meñ

hone ko kyā nahīñ hai tumhārī nigāh meñ

lekin vo ek chiiz jo hotī hai aah meñ

tauba kī rāhateñ nahīñ mere gunāh meñ

kis darja aa ga.ī hai bulandī nigāh meñ

hālāñki manzileñ bhī na.ī azm bhī nayā

milte haiñ mere naqsh-e-qadam mujh ko raah meñ

bas nuqta-e-nigāh badalne kī der thī

ab mutma.in huuñ zindagī-e-ashk-o-āh meñ

dil ko nashāt-e-ġham se bhī rakhte haiñ duur ham

manzil pe yuuñ khaḌe haiñ ki jaise hoñ raah meñ

tum ne to mujh ko apnī nazar se girā diyā

maiñ ho gayā buland ḳhud apnī nigāh meñ

itna bhi ho na zauq-e-tajassus nigah mein

hail rahen KHud aap hamin apni rah mein

hone ko kya nahin hai tumhaari nigah mein

lekin wo ek chiz jo hoti hai aah mein

tauba ki rahaten nahin mere gunah mein

kis darja aa gai hai bulandi nigah mein

haalanki manzilen bhi nai azm bhi naya

milte hain mere naqsh-e-qadam mujh ko rah mein

bas nuqta-e-nigah badalne ki der thi

ab mutmain hun zindagi-e-ashk-o-ah mein

dil ko nashat-e-gham se bhi rakhte hain dur hum

manzil pe yun khaDe hain ki jaise hon rah mein

tum ne to mujh ko apni nazar se gira diya

main ho gaya buland KHud apni nigah mein