itna hi sahaara dil-e-nakaam bahut hai

itnā hī sahārā dil-e-nākām bahut hai

ab un kā tasavvur hī sar-e-shām bahut hai

ab koī zarūrat hai davā kī na duā kī

jis haal meñ huuñ maiñ mujhe ārām bahut hai

girya se hai āġhāz-e-amal bazm-e-jahāñ meñ

insān ko andesha-e-anjām bahut hai

kam-zarf haiñ karte haiñ jo piine se takalluf

saaqī mujhe ye durd-e-tah-e-jām bahut hai

ubhrī nahīñ dil meñ kabhī ummīd-e-karam bhī

terā ye karam gardish-e-ayyām bahut hai

maiñ naam na lūñgā kabhī fariyād-o-fuġhāñ kā

jiitā huuñ mohabbat meñ yahī kaam bahut hai

ham jaate haiñ pyāse tire mai-ḳhāne se saaqī

sunte to ye the terā karam aam bahut hai

ahbāb kareñ ab na 'sa.īd' is meñ izāfa

dushman se jo miltā hai vo in.aam bahut hai

itna hi sahaara dil-e-nakaam bahut hai

ab un ka tasawwur hi sar-e-sham bahut hai

ab koi zarurat hai dawa ki na dua ki

jis haal mein hun main mujhe aaram bahut hai

girya se hai aaghaz-e-amal bazm-e-jahan mein

insan ko andesha-e-anjam bahut hai

kam-zarf hain karte hain jo pine se takalluf

saqi mujhe ye durd-e-tah-e-jam bahut hai

ubhri nahin dil mein kabhi ummid-e-karam bhi

tera ye karam gardish-e-ayyam bahut hai

main nam na lunga kabhi fariyaad-o-fughan ka

jita hun mohabbat mein yahi kaam bahut hai

hum jate hain pyase tere mai-KHane se saqi

sunte to ye the tera karam aam bahut hai

ahbab karen ab na 'said' is mein izafa

dushman se jo milta hai wo inam bahut hai