itna jaan-soz mere shahr ka sannaTa hai

itnā jāñ-soz mire shahr kā sannāTā hai

mujh ko vīrānoñ kī taqdīr pe rashk aatā hai

sar pe jaltī huī ik dhuup hai tā-hadd-e-nazar

merā saaya mire qadmoñ pe chhupā jaatā hai

'mīr'-o-'ġhālib' kī rivāyāt se bad-zan shā'ir

be-irāda bhī usī raah par aa jaatā hai

kaañp jaatā huuñ ki baḌhne ko haiñ ġham ke saa.e

jab koī lamha masarrat ba-kanār aatā hai

jaane vo lamha kab aa.egā mirī hastī meñ

dil meñ jo aas kī qindīl jalā jaatā hai

qasr-e-mustaqbil-e-rā.anā bhī banāo yaaro

jī bahut maazī ke khañDarāt se ghabrātā hai

jaane kyā baat hai is dhartī kā chehra 'mehdī'

ḳhuun meñ Duub ke kuchh aur nikhar jaatā hai

itna jaan-soz mere shahr ka sannaTa hai

mujh ko viranon ki taqdir pe rashk aata hai

sar pe jalti hui ek dhup hai ta-hadd-e-nazar

mera saya mere qadmon pe chhupa jata hai

'mir'-o-'ghaalib' ki riwayat se bad-zan sha'ir

be-irada bhi usi rah par aa jata hai

kanp jata hun ki baDhne ko hain gham ke sae

jab koi lamha masarrat ba-kanar aata hai

jaane wo lamha kab aaega meri hasti mein

dil mein jo aas ki qindil jala jata hai

qasr-e-mustaqbil-e-raana bhi banao yaro

ji bahut mazi ke khanDaraat se ghabraata hai

jaane kya baat hai is dharti ka chehra 'mehdi'

KHun mein Dub ke kuchh aur nikhar jata hai