اتنا جاں سوز مرے شہر کا سناٹا ہے

اتنا جاں سوز مرے شہر کا سناٹا ہے

مجھ کو ویرانوں کی تقدیر پہ رشک آتا ہے

سر پہ جلتی ہوئی اک دھوپ ہے تا حد نظر

میرا سایہ مرے قدموں پہ چھپا جاتا ہے

میرؔ و غالبؔ کی روایات سے بد ظن شاعر

بے ارادہ بھی اسی راہ پر آ جاتا ہے

کانپ جاتا ہوں کہ بڑھنے کو ہیں غم کے سائے

جب کوئی لمحہ مسرت بکنار آتا ہے

جانے وہ لمحہ کب آئے گا مری ہستی میں

دل میں جو آس کی قندیل جلا جاتا ہے

قصر مستقبل رعنا بھی بناؤ یارو

جی بہت ماضی کے کھنڈرات سے گھبراتا ہے

جانے کیا بات ہے اس دھرتی کا چہرہ مہدیؔ

خون میں ڈوب کے کچھ اور نکھر جاتا ہے