itna majbur na kar baat banane lag jaen

itnā majbūr na kar baat banāne lag jaa.eñ

ham tire sar kī qasam jhuuT hī khāne lag jaa.eñ

itne sannāTe piye merī samā'at ne ki ab

sirf āvāz pe chāhūñ to nishāne lag jaa.eñ

chaliye kuchh aur nahīñ āh-shumārī hī sahī

ham kisī kaam to is dil ke bahāne lag jaa.eñ

ham vo gum-gasht-e-mohabbat haiñ ki tum to kyā ho

ḳhud ko ham DhūñDne nikleñ to zamāne lag jaa.eñ

ḳhvāb kuchh aise dikhā.e haiñ faqīrī ne mujhe

jin kī tā'bīr meñ shāhoñ ke ḳhazāne lag jaa.eñ

maiñ agar apnī javānī ke sunā duuñ qisse

ye jo lauñDe haiñ mire paañv dabāne lag jaa.eñ

itna majbur na kar baat banane lag jaen

hum tere sar ki qasam jhuT hi khane lag jaen

itne sannaTe piye meri sama'at ne ki ab

sirf aawaz pe chahun to nishane lag jaen

chaliye kuchh aur nahin aah-shumari hi sahi

hum kisi kaam to is dil ke bahane lag jaen

hum wo gum-gasht-e-mohabbat hain ki tum to kya ho

KHud ko hum DhunDne niklen to zamane lag jaen

KHwab kuchh aise dikhae hain faqiri ne mujhe

jin ki ta'bir mein shahon ke KHazane lag jaen

main agar apni jawani ke suna dun qisse

ye jo launDe hain mere panw dabane lag jaen