اتنا مجبور نہ کر بات بنانے لگ جائیں

اتنا مجبور نہ کر بات بنانے لگ جائیں

ہم ترے سر کی قسم جھوٹ ہی کھانے لگ جائیں

اتنے سناٹے پیے میری سماعت نے کہ اب

صرف آواز پہ چاہوں تو نشانے لگ جائیں

چلئے کچھ اور ۔۔۔نہیں آہ شماری ہی سہی

ہم کسی کام تو اس دل کے بہانے لگ جائیں

ہم وہ گم گشت محبت ہیں کہ تم تو کیا ہو

خود کو ہم ڈھونڈنے نکلیں تو زمانے لگ جائیں

خواب کچھ ایسے دکھائے ہیں فقیری نے مجھے

جن کی تعبیر میں شاہوں کے خزانے لگ جائیں

میں اگر اپنی جوانی کے سنا دوں قصے

یہ جو لونڈے ہیں مرے پاؤں دبانے لگ جائیں