اتنا مزاج وقت کا بدلا ہوا نہ تھا

اتنا مزاج وقت کا بدلا ہوا نہ تھا

گوہر سمندروں میں کبھی چیختا نہ تھا

دنیا کا بھید اس لیے مجھ پر کھلا نہ تھا

میں نے کتاب زیست کو اب تک پڑھا نہ تھا

بکھرا ہوا ہوں ذروں کی مانند کو بہ کو

میں اپنی ذات سے کبھی اتنا کٹا نہ تھا

کل رات تیری بزم میں اے جان انبساط

ہر شخص اجنبی تھا کوئی آشنا نہ تھا

سارا ہی شہر اجنبی آنے لگا نظر

یہ اور بات ہے کوئی چہرہ نیا نہ تھا

پرویزؔ آبلوں نے جو بخشی ہیں لذتیں

ان لذتوں سے پہلے کبھی آشنا نہ تھا