اتنا سکون تو غم پنہاں میں آ گیا

اتنا سکون تو غم پنہاں میں آ گیا

آغوش دل سے دامن مژگاں میں آ گیا

دل اشک بن کے دیدۂ گریاں میں آ گیا

خورشید جیسے روزن زنداں میں آ گیا

مجھ کو تو رنگ و بو میں الجھنے سے تھا گریز

میں نے یہ کیا کیا کہ گلستاں میں آ گیا

عکس جمال یار بتدریج ذوق دید

آنکھوں سے دل میں دل سے رگ جاں میں آ گیا

پھر میرے اپنے آپ میں رہنے کا کیا سوال

جب وہ مرے حریم دل و جاں میں آ گیا

مرہم کا نام لے کے نہ زخموں کو چھیڑئیے

مرہم بھلا کہاں سے نمکداں میں آ گیا

وحشت اثر فضا ہے نہ دیوار و در یہاں

بیکار ہی میں گھر سے بیاباں میں آ گیا

اخگرؔ جنون عشق نوردی کدھر گیا

مجنوں تو میرے خانۂ ویراں میں آ گیا