itna sukun to gham-e-pinhan mein aa gaya

itnā sukūn to ġham-e-pinhāñ meñ aa gayā

āġhosh-e-dil se dāman-e-mizhgāñ meñ aa gayā

dil ashk ban ke dīda-e-giryāñ meñ aa gayā

ḳhurshīd jaise rauzan-e-zindāñ meñ aa gayā

mujh ko to rañg-o-bū meñ ulajhne se thā gurez

maiñ ne ye kyā kiyā ki gulistāñ meñ aa gayā

aks-e-jamāl-e-yār ba-tadrīj-e-zauq-e-dīd

āñkhoñ se dil meñ dil se rag-e-jāñ meñ aa gayā

phir mere apne aap meñ rahne kā kyā savāl

jab vo mire harīm-e-dil-o-jāñ meñ aa gayā

marham kā naam le ke na zaḳhmoñ ko chheḌiye

marham bhalā kahāñ se namak-dāñ meñ aa gayā

vahshat-asar fazā hai na dīvār-o-dar yahāñ

be-kār hī maiñ ghar se bayābāñ meñ aa gayā

'aḳhgar' junūn-e-ishq-e-navardī kidhar gayā

majnūñ to mere ḳhāna-e-vīrāñ meñ aa gayā

itna sukun to gham-e-pinhan mein aa gaya

aaghosh-e-dil se daman-e-mizhgan mein aa gaya

dil ashk ban ke dida-e-giryan mein aa gaya

KHurshid jaise rauzan-e-zindan mein aa gaya

mujh ko to rang-o-bu mein ulajhne se tha gurez

main ne ye kya kiya ki gulistan mein aa gaya

aks-e-jamal-e-yar ba-tadrij-e-zauq-e-did

aankhon se dil mein dil se rag-e-jaan mein aa gaya

phir mere apne aap mein rahne ka kya sawal

jab wo mere harim-e-dil-o-jaan mein aa gaya

marham ka nam le ke na zaKHmon ko chheDiye

marham bhala kahan se namak-dan mein aa gaya

wahshat-asar faza hai na diwar-o-dar yahan

be-kar hi main ghar se bayaban mein aa gaya

'aKHgar' junun-e-ishq-e-nawardi kidhar gaya

majnun to mere KHana-e-viran mein aa gaya