itna to irtibaat ho us sang-e-dar ke sath

itnā to irtibāt ho us sang-e-dar ke saath

jhuk jaa.e kā.enāt bhī sajde meñ sar ke saath

ehsān-e-ġhair aur rah-e-manzil-e-habīb

hai nang-e-justujū jo chalūñ rāhbar ke saath

vo zarra-hā-e-dil bhī baḌe ḳhush-nasīb haiñ

vābasta ho ga.e jo tirī rahguzar ke saath

manzil kī fikr kyā hai ki ai rah-navard-e-shauq

manzil to har qadam pe hai azm-e-safar ke saath

dekhā kiye haiñ ḳhuub nasheb-o-farāz-e-dahr

khelā kiye haiñ fitna-e-shām-o-sahar ke saath

ġhairat kā hai maqām garebāñ ke vāste

dāman ne jo sulūk kiyā chashm-e-tar ke saath

guzre haiñ ham pe ishq meñ aise bhī hādse

ik rabt-e-ḳhās hai jinheñ terī nazar ke saath

'jauhar' hujūm-e-shauq meñ itnā to tum na ho

apnī ḳhabar bhī chāhiye un kī ḳhabar ke saath

itna to irtibaat ho us sang-e-dar ke sath

jhuk jae kaenat bhi sajde mein sar ke sath

ehsan-e-ghair aur rah-e-manzil-e-habib

hai nang-e-justuju jo chalun rahbar ke sath

wo zarra-ha-e-dil bhi baDe KHush-nasib hain

wabasta ho gae jo teri rahguzar ke sath

manzil ki fikr kya hai ki ai rah-naward-e-shauq

manzil to har qadam pe hai azm-e-safar ke sath

dekha kiye hain KHub nasheb-o-faraaz-e-dahr

khela kiye hain fitna-e-sham-o-sahar ke sath

ghairat ka hai maqam gareban ke waste

daman ne jo suluk kiya chashm-e-tar ke sath

guzre hain hum pe ishq mein aise bhi hadse

ek rabt-e-KHas hai jinhen teri nazar ke sath

'jauhar' hujum-e-shauq mein itna to tum na ho

apni KHabar bhi chahiye un ki KHabar ke sath