اتنا تو ارتباط ہو اس سنگ در کے ساتھ

اتنا تو ارتباط ہو اس سنگ در کے ساتھ

جھک جائے کائنات بھی سجدے میں سر کے ساتھ

احسان غیر اور رہ منزل حبیب

ہے ننگ جستجو جو چلوں راہبر کے ساتھ

وہ ذرہ ہائے دل بھی بڑے خوش نصیب ہیں

وابستہ ہو گئے جو تری رہ گزر کے ساتھ

منزل کی فکر کیا ہے کہ اے رہ نورد شوق

منزل تو ہر قدم پہ ہے عزم سفر کے ساتھ

دیکھا کئے ہیں خوب نشیب و فراز دہر

کھیلا کئے ہیں فتنۂ شام و سحر کے ساتھ

غیرت کا ہے مقام گریباں کے واسطے

دامن نے جو سلوک کیا چشم تر کے ساتھ

گزرے ہیں ہم پہ عشق میں ایسے بھی حادثے

اک ربط خاص ہے جنہیں تیری نظر کے ساتھ

جوہرؔ ہجوم شوق میں اتنا تو تم نہ ہو

اپنی خبر بھی چاہئے ان کی خبر کے ساتھ