اتنا تو کرم مجھ پر اللہ تو فرما دے

اتنا تو کرم مجھ پر اللہ تو فرما دے

دنیا کو محبت کی خوشبو سے تو مہکا دے

پابند سلاسل کیوں دیوانے کو کرتا ہے

دیوانے کے قدموں کو اب وسعت صحرا دے

دامان طلب اپنا اتنا نہ کشادہ کر

دینا ہو جسے سوچے دے اس کو تو کیا کیا دے

ساقی کی نگاہوں کی مستی مجھے کافی ہے

اللہ مجھے پھر کیوں فکر مے و مینا دے

وہ سوز و گداز دل اب ہم میں کہاں باقی

جو روح کو تڑپا دے جو قلب کو گرما دے

کعبے میں تجھے ڈھونڈوں یا دیر و کلیسا میں

پاؤں میں کہاں تجھ کو اب کچھ تو اشارے دے

دل راحت ساحل کا قائل ہی نہیں وصفیؔ

دینا ہے اگر مجھ کو تو شورش دریا دے