itna to zindagi pe mujhe iKHtiyar ho

itnā to zindagī pe mujhe iḳhtiyār ho

apnā chaḌhāv zehn pe apnā utaar ho

hai kaun jo vafā kare mujh se mire sivā

so mujh ko ishq aap hī se baar baar ho

tā-umr ḳhāmushī hī rahe ham-navā mirī

tanhā.ī ke sivā na koī ġham-gusār ho

is ke sivā kisī se mujhe kyā hī chāhiye

hasrat kī pālkī kā koī dil kahār ho

jo pahle aa.e haiñ vahī duniyā se jaa.eñ bhī

miTne kā saarā kaam ye tartīb-vār ho

shā.ir vo saarī umr akelā rahā bahut

'bānī' ke ās-pās hī apnā mazār ho

kah deñ ki husn itnī baḌī chiiz bhī nahīñ

sar pe jo koī roz sadāqat savār ho

khiḌkī se dekhte raheñ in parbatoñ kā husn

Table pe kārvāñ baje lab pe cigar ho

baaqī dukhoñ ke vāste bhī khol rakh kivāḌ

'rāhul' na ek dard pe yuuñ inhisār ho

itna to zindagi pe mujhe iKHtiyar ho

apna chaDhaw zehn pe apna utar ho

hai kaun jo wafa kare mujh se mere siwa

so mujh ko ishq aap hi se bar bar ho

ta-umr KHamushi hi rahe ham-nawa meri

tanhai ke siwa na koi gham-gusar ho

is ke siwa kisi se mujhe kya hi chahiye

hasrat ki palki ka koi dil kahaar ho

jo pahle aae hain wahi duniya se jaen bhi

miTne ka sara kaam ye tartib-war ho

shair wo sari umr akela raha bahut

'bani' ke aas-pas hi apna mazar ho

kah den ki husn itni baDi chiz bhi nahin

sar pe jo koi roz sadaqat sawar ho

khiDki se dekhte rahen in parbaton ka husn

Table pe karwan baje lab pe cigar ho

baqi dukhon ke waste bhi khol rakh kiwaD

'rahul' na ek dard pe yun inhisar ho