اتنا تو زندگی پہ مجھے اختیار ہو

اتنا تو زندگی پہ مجھے اختیار ہو

اپنا چڑھاؤ ذہن پہ اپنا اتار ہو

ہے کون جو وفا کرے مجھ سے مرے سوا

سو مجھ کو عشق آپ ہی سے بار بار ہو

تا عمر خامشی ہی رہے ہم نوا مری

تنہائی کے سوا نہ کوئی غم گسار ہو

اس کے سوا کسی سے مجھے کیا ہی چاہیئے

حسرت کی پالکی کا کوئی دل کہار ہو

جو پہلے آئے ہیں وہی دنیا سے جائیں بھی

مٹنے کا سارا کام یہ ترتیب وار ہو

شاعر وہ ساری عمر اکیلا رہا بہت

بانیؔ کے آس پاس ہی اپنا مزار ہو

کہہ دیں کہ حسن اتنی بڑی چیز بھی نہیں

سر پہ جو کوئی روز صداقت سوار ہو

کھڑکی سے دیکھتے رہیں ان پربتوں کا حسن

ٹیبل پہ کارواں بجے لب پہ سگار ہو

باقی دکھوں کے واسطے بھی کھول رکھ کواڑ

راہلؔ نہ ایک درد پہ یوں انحصار ہو